ភ្នំពេញ៖ ប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បានអបអរសាទរដល់លោក ហ៊ុន ម៉ាណែត ដែលត្រូវបាន គណៈកម្មាធិការកណ្តាល បោះឆ្នោតជ្រើសតាំងជាប្រធានកិត្តិយសសហភាពសហព័ន្ធយុវជនកម្ពុជា។
លោកបានសរសេរនៅលើហ្វេសបុកផេករបស់លោកនៅថ្ងៃទី២៨ ខែវិច្ឆិកា ឆ្នាំ២០២២ នេះថា៖ «ក្នុងនាមជាសមាជិកមួយរូបនៃ ក្រុមគ្រួសារ ស.ស.យ.ក. ខ្ញុំសូមចូលរួមអបអរសាទរ ឯកឧត្តមបណ្ឌិត ហ៊ុន ម៉ាណែត ដែលត្រូវបានគណៈកម្មាធិការកណ្តាល បោះឆ្នោតជ្រើសតាំងជាប្រធានកិត្តិយសសហភាពសហព័ន្ធយុវជនកម្ពុជា។ ហើយក្នុងនាមជាប្អូន ខ្ញុំពិតជាមានមោទកភាពចំពោះបងប្រុស និងសូមគោរពជូនពរបងប្រុសទទួលបានជោគជ័យបន្ថែមទៀត ក្នុងបេសកកម្មបម្រើជាតិ មាតុភូមិ និងប្រជាជន ជាពិសេស តាមរយៈតួនាទីថ្មីមួយនេះ»។
សហភាពសហព័ន្ធយុវជនកម្ពុជា ឈ្មោះដើមជា សមាគមយុវជនសាមគ្គីសង្គ្រោះជាតិកម្ពុជា ដែលជាផ្នែកមួយនៃរណសិរ្សសាមគ្គីសង្គ្រោះជាតិកម្ពុជា ក្នុងការចូលរួមរំដោះជាតិមាតុភូមិចេញពីរបបប្រល័យពូជសាសន៍ខ្មែរក្រហម រហូតទទួលបានជោគជ័យនាថ្ងៃ៧ មករា ឆ្នាំ១៩៧៩៕
